Мокшень кяльса синтаксисонь эльбятьксне и синь васьфневомасна

Рогожина В.Ф., заведующий лабораторией этнокультурного образования ГБУ ДПО РМ «Центр непрерывного повышения профессионального мастерства педагогических работников – «ПЕДАГОГ 13. РУ»

Содаф, што сочинениянь, изложениянь, диктантонь сёрмадомста тонафнихне тиендихть эрь кодама эльбятькст. Тяса и валонь тиемать, и морфологиять, и пунктуациять, и синтаксисть коряс эльбятьксне.

Мокшень кялень тонафтыти эряви маштомс пачфтема тонафнихненди ся правилатнень, конатне лездыхть аф нолямс эльбятькст кода корхтамста, станя и сёрмадомста.

Тя статьяса мон лоткан синтаксисонь инь сидеста васьфневи эльбятькснень лангс, максан аф оцю лезкс тяфтама эльбятькснень петемаснон колга.

Синтаксисонь эльбятьксокс лувовихть стама эльбятьксне, мзярда валрисьмоса колсеви валонь порядкась (валхнень фкя-фкянь мельге молемасна), мзярда эрь кодама валзюлмотнень ёткса аф кирдеви соткссь, мзярда синтаксическяй сложнай целайть лангс аф шарфтови мяль и стак тов.

Мярьголень, синтаксисонь эльбятькст васьфневихть и художественнай произведениятнень эса, лияста и «Мокшень правда» газетать лопанянзон эса. Да и ломаттнень фкя-фкянь мархта корхтамстовок васьфневихть синтаксисонь эльбятькст.

Штоба петемс синтаксисонь эльбятькснень, эряви сяда сидеста мокшень кялень тонафтыти шарфнемс мяль валонь порядкать лангс.

Кепотьксонди, валзюлмоть ётамста можна макссемс тяфтама заданият:

а) валхнень мархта арьседа валзюлмот;

б) валрисьмотнень эзда сёрмадость эрь кодама валзюлмотнень;

в) няфтесть, кона валрисьмотнень эса колаф валонь порядкась (валхнень фкя-фкянь мельге молемасна) и стак тов.

(Китькстаса, валрисьмотнень эса валонь порядкась колаф).

1-це карточкась.

  1. И арась акша мокшень щамоц шуфтоннекс (Эльбятькссь – качественнай прилагательнайсь сёрмадома относительнай прилагательнайть мельге. Аф сембе мокшетнень шяярьсна акшет. Корхтамась мольсь щамть колга. Мокшетнень щамсна акшет).
  2. Сембода сидеста явондыхть мирттне-рьвятне, мзярда алять колмоце веронь группац, а авать омбоцесь или колмоцесь. (Эльбятькссь – порядковай числительнайсь сёрмадома существительнайда меле. Версь медицинань ширде явф группава. Сембоц – ниле группада: васенце, омбоце, колмоце, нилеце).
  3.  Сявомс фкя свежай саразонь ал, путомс пяле литрань тяльги клянцеконь банкас и каямс лангозонза банкать пяле видева уксуснай эссенция. (Эльбятькссь – лувксонь числительнайсь и качественнай прилагательнайсь сёрмадомат относительнай прилагательнайда меле. Корхтамась мольсь фкя алть колга, свежай алть колга. А аф фкя свежай саразть колга).
  4. Мелкайняста керсемс «Антоновка» сортонь 6 марьхть, шорямс синь 400 грамма свежай апак салыяфтф тувонь потма куя мархта и путомс духовкас солама. (Эльбятькссь – относительнай прилагательнайсь сёрмадома апак отрицаниять мархта причастиять инголи. Корхтамась мольсь тувонь куять колга, тувонь свежай апак салыяфтф потма куять колга. А аф апак салыяфтф тувоть колга).
  5. Ламотне кунара валондсазь кудонь растениятнень тапаф сараз алонь тапаф кедень настойкаса, мезсь ладяй и рассадань касфтомста. (Эльбятькссь – тапаф валсь аф эряви. Кда саразсь тапаф, эста кодама ал?).

Виде вариантсь.

И арась мокшень акша щамоц шуфтоннекс. Сембода сидеста явондыхть мирттне-рьвятне, мзярда алять веронь колмоце группац, а авать омбоцесь или колмоцесь. Сявомс саразонь свежай фкя ал, путомс пяле литрань тяльги клянцеконь банкас и каямс лангозонза банкать пяле видева уксуснай эссенция. Мелкайняста керсемс «Антоновка» сортонь 6 марьхть, шорямс синь 400 грамма тувонь свежай апак салыяфтф потма куя мархта и путомс духовкас солама.  Ламотне кунара валондсазь кудонь растениятнень сараз алонь тапаф кедень настойкаса, мезсь ладяй и рассадань касфтомста.

Валрисьмонь однороднай члеттнень ётамста можна макссемс тяфтама заданият:

а) лувомс валрисьмотнень, мумс эздост валрисьмонь однороднай члеттнень;

б) тяштемс, кодама корхтама пяльксса синь няфтевихть.

1-це карточкась.

  1. Эсь тиф шрать ваксса тумонь эчке мокорь лангс озафоль атя, порсь шурьхкя толгада и сускондсь верок тувонь сивольда (С. Ларионов). (Эльбятькссь – относительнай прилагательнайсь сёрмадома качественнай прилагательнайть инголи. Корхтамась мольсь верок сивольть колга. А аф верок тувоть колга).
  2. Подполковниксь лоткафтозе фкя рабочайть, салаваня мярьгсь чистай рузонь кяльса (М. Кяшкин). (Эльбятькссь – относительнай прилагательнайсь сёрмадома качественнай прилагательнайть инголи).
  3. А сяльде марянь валхт: «Стяк ни. Мес тнярс удат?». Шарфтонь, няень каршестон апак нарак алянь шама, кона тейне няевсь сирекс.  (Эльбятькссь – относительнай прилагательнайсь сёрмадома апак отрицаниять мархта причастиять инголи. Корхтамась мольсь алянь апак нарак шамать колга. А аф апак нарак алять колга).

Виде вариантсь.

Эсь тиф шрать ваксса тумонь эчке мокорь лангс озафоль атя, порсь шурьхкя толгада и сускондсь тувонь верок сивольда (С. Ларионов). Подполковниксь лоткафтозе фкя рабочайть, салаваня мярьгсь рузонь ару кяльса (М. Кяшкин). А сяльде марянь валхт: «Стяк ни. Мес тнярс удат?». Шарфтонь, няень каршестон алянь апак нарак шама, кона тейне няевсь сирекс. 

Синтаксисонь эльбятькснень ёткста явфтолеськ эльбятькснень, конат васьфневихть синтаксическяй сложнай целайса. Кепотьксонди, фкя валрисьмоть эса лама аф фкя лацонь придаточнай валрисьмода. Придаточнайхнень эса валонь порядкась колсеви.

Улихть вастт, коса сноскаса максф лиякс ётафтф греконь валсь, сяс мес кой-коста фкя сяка греконь валсь шарьхкодеви аф фкя мяльса. (Эльбятькссь – лувксонь числительнайсь и няфтемань местоимениясь сёрмадомат относительнай прилагательнайда меле).

Виде вариантсь.

Улихть вастт, коса сноскаса максф лиякс ётафтф греконь валсь, сяс мес кой-коста греконь фкя сяка валсь шарьхкодеви аф фкя мяльса.

Арьсян, кда мокшень кялень тонафтысь сяда сидеста кармай ётафнема эрь кодама работа валонь порядкать лангса, эста тонафнихнень корхтамасост и сёрматфкссост синтаксисонь эльбятькста кармай улема сяда кржа.

Добавить комментарий