Седова П.Е, доцент лаборатории этнокультурного образования
ГБУ ДПО РМ «Центр непрерывного повышения профессионального мастерства педагогических работников – «ПЕДАГОГ 13. РУ»
Мокшень кяльса валлувкссь сатомшка козя, но валхне марса васьфневихть аньцек валксса. Кода и лия кяльхнень эса эрь валть смузец панжеви лия валхнень мархта лекскикань, грамматикань, синтаксисонь соткснень вельде. Валксть коряс минь няйсаськ, што валхнень васьфневихть фкя или лама смузьса, синь ули виде и аф виде смузьсна, эста синь текстса или корхтамаса основной смузьда башка кандыхть лия смузь. Валхнень ёткса аф фкя лаца васьфневомась эряй сяс, мес эрь текстть сонцень валлувксоц: научнай текстса сяда сидеста васьфневихть научнай термитт, а художественнай текстть валлувксоц козя сидеста васьфневи нейтральнай смузь мархта валса. Художественнай тексттнень эсь лацонь ширесна тоса, што синь эсост сидеста васьфневихть эмоциональнай смузь мархта.
Сидеста васьфневи валлувксти кандови равжа валсь. Мокшень кялень валлувксса «равжа» валть васенце смузец няфти тюс. Смузень ётамать вельде «равжа» валсь няфти аф аньцек тюс, но и корхтай кальдяв тевонь колга. Эрясь кудняса Равжаля. Тяфта ломаттне лемдезь равжа сакалонзон, а сяда пяк равжа тевонзон инкса. «Равжа» валсь сотови сакалонзон, тевонзонвалхнень мархта сембе лемтьф соткснень коряс.
Эряфонь эрь кодама ситуациять колга азондомста вешенттяма сембода эрявикс валхт, нолясаськ тевс валлувксонь средстватнень: синонипнень, омонипнень, кевонзаф валзюлмотнень. Тя эряви сянкса, штоба сяда крхкаста панжемс мяльсь-арьсемась, няфтемс сяда крхкаста башка валть смузенц. Макстама валгярькст и ванцаськ, кодама смузьса и кодама текстса васьфневи эрь валсь. Молемс – ётамс – аськолямс; шаштомс – кялемс; шама – лик – нярь; ярхцамс – тетькомс – поремс – кавлямс – тялямс. Кой-конат эздост васьфневихть сидеста и лувовихть нейтральнайкс. А аф нейтральнай смузь мархта валхне няфтьсазь кодама мяль вельде азови тя-тона валсь – пеедезь или кяжда, пичедезь или кенярдезь, шнамга или сялдомга и стак тов.
Аськолямс, кялемс, шама, ярхцамс валхне кандовихть сидеста васьфневи валлувксти, малат литературнай стильти и тянкса сидеста васьфневихть мокшень кяльса сёрматфнень эса. Валдомсь стирть шамац, мярьгат, солась лангстонза сюнерь коволнясь. Кить кучкава мольсь сери, аф ламода канаскотф, шаржу сакал атя (Л. Макулов).
Аськолямс валсь няфти движениянь смузь кода и молемс валсь, но сяда сидеста моли кепотьф мяль смузь мархта. «Эрь, спасибо Шкайти-кормилецьти, вачеда, пади, аф иляттама!» – аськоляй весяласта куду тядяц и розь шаванять вельхксса кайси крёскат (И. Кудашкин).
Нярь валсь (кда корхтамась моли ломанть колга) мала художественно-разговорнайти или просторечнай валлувксти. Курсаттне нолдазь нярьснон (М. Кяшкин).
Эмоциональнай смузь мархта валхне лездыхть шарьхкодемс текстть экспрессивно-эмоциональнай ширенц. Мокшень кялень валксса васьфневихть цёра, стирь, идь, аля валхне, синь аф кандыхть башка смузь и лувовихть сидеста васьфневикс. Ня уматнень алятне витцесазь сёрода (Я. Пинясов); Ня ломаттне Россиять стама жа иденза, кода и минь (М. Сайгин). Художественнай произведениятнень эса кой-коста ня валхне молихть лия формаса: церабай, стирька, идьмор, алямор. Эста синь молихть пеедема, рахсема смузь мархта. Къда станя, на сявк, лувсак, мезе Степан Тимофеевич сёрмады аляморхненди (И. Кишняков). Тон корхтак идьморть, васькафнек, штоба сон тейть тонадоль (Я. Пинясов).
Мокшень кяльса сермадыхне сатнихть оцю выразительность, кда нейтральнай валлувксти суавафтыхть эмоциянь ширде козя валхт. Мокшень кяльса сидеста васьфневи парши валсь, кона корхтай ломанть уликсонц колга. Кой-коста лувихне содайхть айтюбяльня валть мархта, кона няфти ломанть марнек паршиензон лангс, но пеедема смузь вельде. И, виде, сяка шиня кочказень эсь айтюбяльнянзон, мусь Емла Речкина шири моли улав и сявозень тоза (Мокша).
5-це класса тонафнихне мокшень кялень урокса валлувксть тонафнемста содайхть синонимонь ряттнень и синь етксост экспрессивнай синонипнень мархта. Эряви азомс, што синонимонь валонь кярьмазда сяда лама васьфневи глаголхнень еткса. Кепотьксонди фкя валонь кярьмаз: прамс – реськафтомс – руцькафтомс. Васенце валть васьфневомац сяда кели, сяс сувси общеупотребительнай валлувксти. Руцькафтомс, реськафтомс валхне васьфневихть сяда шуроста и синь вельдест няфневи кяжияма. Кда эрявкстат, сон тонь кепоттянза мянь менели, а колайть мяленц – руцькафттанза мастору (И. Кудашкин). Ся веня тунь залу и реськафтонь диванцень лангс: алон ашель простынь, лангсон – вельхтяма, прязень путыне кядезень лангс и курокста матодовонь (И. Кудашкин). Тяфтама смузь мархта валхне сяда сидеста васьфневихть эсьётконь корхтамаса, сёрматфса – художественно-разговорнай стильса.
Тяка жа валюромти кандовихть максф валонь кярьмасне, конань эса лия шрифтьса няфтьф валхнень вельде ломанць азсы эсь мяленц или тисы действиять ужяльдема, пеедема, кяж мархта: корхтамс – шотнамс, кальдяв – рясаня, пякстамс – лашадемс, каямс — тескафтомс и стак тов.. Тя мяльть шарьхкодемс саты фкя валрисьмось: «Арьсек кода мяльце» – кяжде пшкядсь сон и лашадезе кенкшть (Ю. Кузнецов). А мезе тяни шотнат – тя васькафнеть, – и шарфтозе прянц, штоба аф ваномс инжиенц лангс (В. Мишанина). Катк таштонят, рясанят, но улест арунят иднятне(Я. Пинясов). И эста Акся баба фатясь байдек и кодак тескафтсы Аверяскинонь пряти … (А. Тяпаев). Тяфтама валса, конат няфтихть ломанть потмоширень состояниянц лангс, козя мокшень кялень корхтамась и сермадомась.
Валхне, конат тифт кирьфтамань, ляпошинь суффикс вельде, тяфта жа кандыхть экспрессивно-эмоциональнай смузь. Тяфтама смузьсна фкя валъюронь валхнень: лятфнемат – лятфнемкат, корхнемат – корхнемкат, стирь – стирька, валом – валомня, тяка – тяконя и стак тов.Тяконя-ажаня монь иднязе (А. Мокшони).
Мокшень кяльсь пяк козя полисемантическяй валса. Етафтф смузьса валхне сидеста кандыхть экспрессивно-эмоциональнай смузь. Тяфтама валкс лувовихть валхне: пидемс (васькафнемс), урафтомс (покодемс), лапамс (корхтамс) и лият. А мон иляттнень – иляттнень урафнень: статьят газетав серматкшнень (Ю. Кузнецов). Э-э, Куля ялгай, зря лапасак кяльцень (В. Мишанина). Кинь мациенц, кинь саразонц уйфтят (В. Мишанина). Тяфтама смузь мархта валхне аф коласазь литературнай норматнень, синь лувовихть нейтральнай валкс, но сяда сидеста васьфневихть устнай корхтамаса или художественно-разговорнай стильса.
Художественно-разговорнай стильсь козя экспрессия смузь мархта валса, конат сувсихть мокшень корхтаматнень эзда. Сидеста васьфневихть валонь формат, конат тиевихть грамматикань норматнень коряс. — гай, — ган, — гун валбяльксне тиихть валонь формат, конат васьфневихть кода корхтамаса и станя и мокшень кялень сёрматфнень эса, мезсь малатфтсы сёрматфть разговорнай стильти. Къда сотомс ня валбялькснень сидеста васьфневи валхненди, то сонь эсонза эвондай кодама-бъди лия смузь, кяж или пеедема: тюрьган, кяльгун, Петягай, Ванягай. Сетьмок ворлюган! Тиндеенть сембонди фкя килькшске аш ков тиемс (М. Брыжинский).
Тяфтама жа смузьса ащихть глаголхне, къда кошардомань наклоненияса тейст сотовихть —а, -ая, -ва частицат, конатнень вельде мярьгови тевсь ляпоми. Кепотьксонди: Вай, аванят, ванодова, ванодова! Тейнек посабляйхть састь, жалакодсть келесост аватне (М. Бебан).
Кой-коста —ва частицати сотневихть нинге —ка, или —ть частицатне, а мекольцети нинге сотневи —сь частицась. Синь сембе башка или марса полафтсазь валть смузенц. Тяфтама валбялькснень вельде сяда касы пеедемань смузсь, и синь вельдест сёрматфсь малады художественно-разговорнай стильти, коса сяда сидеста васьфневихть экспрессивно-эмоциональнай смузь мархта валхне. «А тяни арядавака пялон, ванцасть кода эряй Язва баба» (Я. Пинясов). Аредовать! – Эрязста щазе орнянц Федяня (М. Бебан). А мъзярда конфетань ящикне панжихть? .. Тячи?.. Ваттакась, а конфетада лядсь – курмозезт тяльгихть… (И. Кудашкин). Мон монць курок улян аляшка-а, – аварьгодсь Антошась и няфтезе пяштешка клоконянц. – Норавакась, касондярян – няфтьса!.. (П. Левчаев). Ваттака, вирьса мондедонга виихть улихть (Я. Пинясов).
Мокшень литературнай кяльть кафта форманза – устнай и письменнай. Минь серматтама норматнень коряс, конат пингонь-пингонь ванондовихть одукс. Корхтамаса ня норматне пяк аф кирдевихть, сяс эрь корхтайсь ноляй кодама-бди валхт или валонь формат эсь велень корхтамастонза. Тянь колга корхтайхть вяре максф кепотьксне частицатнень и экспрессиянь смузьса валхнень мархта, конат кемоста сувасть сермадомань кяльти.
Марнек валхне и валонь форматне, конань эса ули экспрессиянь смузь, няфтьсазь мокшень кяльть козяшинц. Минь няйсаськ, што мокшень кялень валлувкссь козя лексемаса, конат кандыхть нейтральнай смузь и пяк лама валда и валонь формада экспрессивно-эмоциональнай смузь мархта. Тяфтама валхнень вельде сяда келиста панжевихть ломанть потмоширень мяленза-арьсеманза. Сяс валть функцияц аф аньцек азомань, лемдемань, но сонь вельденза максови питне, и сидеста сон тии лувить инголе эрявикс образность.
Литературась:
- Левчаев П.И. Эрь сёрматтама сяда мазы валса! – Мокша, 1972, №2, с. 86-88.
- Левчаев П.И. Кяльсь козя валса. – Мокшень правда, 1970, 22 февр.
- Левчаев П.И. Ванфтомс валть мазы-шинц: — Мокшень правда, 1981, 21 ноябрь.
- Лексикология современных мордовских языков / Под ред. Д.В. Цыганкина. – Саранск: Изд. Мордов. ун-та, 1983. – 293 с.
- Липатов С.И. Маштт лац корхтама и сёрмадома. – Мокшень правда, 1979, 19 июнь.
- Седова П.Е. Мокшень кяльса синонипнень молемасна. Журнал «Мокша» , 2003. – №10. – С. 124 –128.